Mirakitra hafatra ho an’ny ankizy, ny ray aman-dreny ary ny manodidina. Tsy ny olon-dehibe ihany no manana alahelo anaty ka miezaka manafina izany fa ny ankizy ihany koa. Tahaka ny mahazo an’i Ana, nandalo trangam-piainana nampalahelo izy ka lasa raiki-tapisaka tao anatiny izany. Ny loza anefa dia lasa misy tasy mipoitra ny vatany rehefa manana fihetseham-po malahelo na tezitra izy. Vao maika nihitatra tamin’ny tanany sy ny lamosiny izany ka vao maika nitombo ny alahelony ary lasa menatra amin’ny fiarahamonina izy. Voarakitra ao amin’ny boky “Ana et la tache”, nosoratan’i Anja Adriana io tantaran’i Ana io. Nanao ny sary nampihangoana ny tantara i Sese Dille. Ahitana pejy 20 ny boky. Natao tamin’ny teny malagasy sy frantsay. Ny “Editions Mixte” no nanatonta azy. Nampahafantarina tamin’ny fomba ofisialy ny 29 aprily 2024, teny amin’ny trano fivarotam-boky Tsipika Ambohijatovo ity boky natao ho an’ny ankizy 8 ka hatramin’ny 12 taona ity. Ankoatra ny trano fivarotam-boky Tsipika dia hita manerana ireo trano fivarotam-boky mpikambana ao amin’ny fikambanan’ny trano fivarotam-boky eto Madagasikara (ALM) ny boky “Ana et la tache”. 46.000 Ariary ny vidiny. Lohahevitra resahin’ny mpanoratra ao anatiny ny tahotry ny fitsaran’ny manodidina, ny fahaizana mifanampy raha misy zavatra manahirana.
Ilaina amin’ny fitaizana ankizy
Mampita hafatra ho an’ny ankizy i Anja Adriana ao anatin’ny boky, “Ana et la tache”, fa “mety misy zavatra mavesatra any anaty fa tsy voatery ho zakaina irery, na tazomina ho anao irery fa mety hiteraka zavatra ratsy”. “Afaka zaraina amin’ny hafa atokisana izany”, hoy izy. Manome hafatra ho an’ny ray amandreny sy ny olon-drehetra ihany koa izy, ao anaty asa sorany: “Tohano ny zanakareo”, “Manana olana daholo na kely na lehibe ary tokony miezaka mahazo sy mahatsapa ny zavatra mahazo ny hafa”. Nambarany fa efa hatramin’ny mbola kely izy tia mamaky boky. Nanomboka 12 taona izy no nanoratra, toy ny fanoratana poezia ho an’ny ray aman-dreniny, ny namany. “Be dia be ny hafatra voaraiko tao anaty boky na nosoratana mpanoratra Malagasy na any ivelany. Hitako ho hevitra tsara indrindra hahazoana hafatra ny boky ka te hitondra izay anjara birikiko amin’izany aho”, hoy i Anja Adriana, manazava ny antony nanoratany boky ho an’ny ankizy. Nanamafy i Andrianjaka John Razakasoa, tomponandraikitra avy ao amin’ny Editions Mixte fa manana ny toerany lehibe amin’ny fitaizana ny ankizy ny boky. “Raha hieritreritra ho lasa lavitra isika dia manana ny toerany lehibe amin’izany ny famoahana boky”, hoy izy. Tamin’ny alalan’ny tetikasa “Ressources éducatives” no namoahan’ny tranomboky Editions Mixte ny boky “Ana et la tache”. Misahana ny tetikasa ny sampandraharahan’ny firenena mikambana ho an’ny fanabeazana, ny siansa ary ny kolontsaina (UNESCO) ary manohana izany ara-bola ny Agence Française de Développement (AFD). Mitentina 22.000 euros ny famatsiana ara-bola ka entina hanohanana ireo fanatontana boky ho an’ny tanora izany. Ho fanamafisana ny fisitrahan’ny ankizy ny fitaovam-panabeazana (materialy sy nomerika) any amin’ny kilasy ambaratonga fototra sy faharoa, aty Afrika tapany atsimo mampiasa ny teny frantsay no tanjon’ny tetikasa. Eo ihany koa ny fampiroboroboana ny literatiora ho an’ny tanora. Efa nisy andiany voalohany ny tetikasa fa amin’ity andiny faharoa ity dia boky 11, antontan’ny trano mpamoaka boky malagasy miisa fito (07) no kasaina ho havoaka, raha ny fampitam-baovao.
Lynda A.